DÍA DAS AVES 2026
Chega unha nova edición do Día das Aves de SEO/BirdLife, unha celebración que terá lugar en toda España durante a fin de semana do 3 e 4 de outubro e que pretende achegar á sociedade ao coñecemento e a conservación destas especies e dos ecosistemas nos que habitan.
Ademais de formar parte do noso patrimonio natural, as aves desempeñan un papel fundamental no funcionamento dos ecosistemas. Entre as súas principais funcións encóntranse o control de determinadas pragas, a dispersión de sementes e a reciclaxe de nutrientes, procesos esenciais para manter o equilibrio ecolóxico e favorecer a biodiversidade, da que tamén depende a nosa calidade de vida.
A observación de aves constitúe unha forma sinxela e enriquecedora de achegarnos á natureza. Ao mesmo tempo identificar especies a través do seu aspecto, canto ou comportamento require atención, paciencia e concentración, e pode converterse nunha actividade beneficiosa tanto para o benestar físico como mental.
Esta edición ofrece igualmente unha boa oportunidade para dar a coñecer ao xílgaro europeo, elixido como Ave do Ano, e sensibilizar sobre as ameazas que afectan ás súas poboacións. Aínda que continúa sendo unha especie habitual en numerosos territorios, enfróntase a diferentes factores de presión, entre eles a captura ilegal, o uso de praguicidas e herbicidas e determinadas prácticas agrícolas intensivas ou extensivas que poden reducir a dispoñibilidade de alimento e de hábitats axeitados.
Observar e coñecer as aves significa comprender mellor os ecosistemas e a necesidade de conservar a biodiversidade que sustenta a vida.
SEO-Pontevedra celebrará o Día das Aves o 4 de outubro cunha ruta guiada con ornitólogos pola Reserva Ornitolóxica de SEO/BirdLife, dentro do Complexo Intermareal Umia-O Grove.
Este evento é aberto e gratuíto.
Convidámosvos a participar!
Se queres máis información sobre a saída só tes que enviarnos un correo a:
seo-pontevedra@seo.org
Enviada en
