Novas

Estes momentos tan difíciles e nos que pouco saímos ao exterior, podemos facelos máis levadeiros tan só con prestar atención cando nos asomemos ao balcón ou miramos pola xanela. 

Cuns prismáticos e un cachiño de ceo poderemos gozar de moitas aves que se moven na nosa contorna e que sempre están despreocupadas e contentas, transmitíndonos esa felicidade, xa sexa cando as observamos ou cando escoitamos as súas chamadas.

Son as aves urbanas que a miúdo pasan desapercibidas pero que viven connosco, nas nosas vilas e cidades e que nos achegan moitos beneficios.

Por todo iso animámosvos a rexistrar todas as especies que observedes, o cal é moi doado:

- Durante uns minutos sairemos ao balcón ou á xanela para observar e escoitar atentamente as aves que nos rodean.

- Se temos prismáticos ou cámara de fotos, mellor; se non, a simple vista tamén vale.

- As horas ideais para detectar aves son pola mañá ou á tardiña.

- Nunha libretiña ou a través dalgunha aplicación para móbil, crea o teu propio caderno de campo. 

Neste caderno anotaremos as observacións diarias:

• Data de observación: apuntar día, mes e ano.

• Lugar de observación: sinalar a rúa, o concello e a provincia onde se fai o avistamento.

• Hora de observación: anotar a hora en que empezamos a observación e na que a rematamos.

• Condicións climáticas: indicaremos a climatoloxía no momento do avistamento. Este apartado é opcional.

• Aves identificadas: escribiremos o nome común da ave e o número que vimos ou oímos.

• Se vos animades, incluso podedes facer algún debuxo da ave vista.

A lámina superior pode axudarnos na identificación das aves urbanas.

Enviada en 03/12/2020 - Ler entrada completa

Aves, mamíferos, réptiles, anfibios e insectos en toda Europa están a sufrir fortes declives poboacionais debido a prácticas agrícolas nocivas. Agora, máis de 2.500 científicos de máximo nivel de toda Europa uníronse para reclamarlle á UE unha reformar profunda da actual Política Agrícola Común (PAC) e frear o declive da natureza.

Organizacións que representan a máis de 2.500 científicos de toda Europa, entre eles diferentes membros de BirdLife, e dalgúns estados non membros uníronse por primeira vez para enviarlle unha carta ao Parlamento Europeo na que describen o “consenso científico inequívoco” sobre a relación entre a intensificación da agricultura e a perda crecente de biodiversidade.

Os científicos instan á UE para transformar a PAC nunha ferramenta fronte ao cambio climático e a perda de biodiversidade, en lugar de mantela como un detonante do declive ambiental.

Actualmente, a cidadanía europea paga preto de 60.000 millóns de euros anuais en subvencións da PAC, que van na súa maioría á agricultura intensiva e industrial. Este modelo agrícola actual favorece a perda de biodiversidade, a contaminación e o saqueo da auga, a perda de calidade do aire, aumentos drásticos no uso de praguicidas e contribúe a acentuar a crise climática.

As poboacións de aves agrarias, indicador excelente da calidade ambiental de áreas agrícolas, sufriron un afundimento do 55% entre 1980 e 2015. A poboación de insectos nalgúns espazos naturais de Alemaña, por exemplo, reduciuse nun 76% en menos de 30 anos. A transformación de cultivos tradicionais en cultivos de regadío, a destrución de  lindeiros arbustivos e illas de biodiversidade nos campos ou a destrución de pastos tradicionais son algunhas das múltiples causas que levaron a diferentes sociedades científicas a pedir outra política agraria ante a Unión Europea.

Enviada en 17/11/2020 - Ler entrada completa

Cada inverno nos litorais ibéricos e un pouco afastados da costa, grupiños de mourelos (Melanitta nigra), nadan boiantes sobre as ondas ou voan a ras de auga formando longas filas.

Os pentumeiros son patos mergulladores estritamente mariños. Os machos son de cor negra, agás no culmen amarelo do peteiro, mentres que as femias teñen tons pardos escuros coas meixelas e parte do pescozo de cor marrón clara. Voan velozmente a ras de auga con rápidos e profundos bater de ás e balanceos laterais. Son aves moi sociables que adoitan formar grandes bandos e ocupar os mesmos sitios cada ano. 

Capturan crustáceos, moluscos e outros animais do fondo mariño, para iso todos se somerxen cun pequeno salto de forma progresiva, desaparecendo baixo a auga.

O seu hábitat invernal fórmano costas pouco profundas, esteiros, baías grandes, rías e praias. Durante a época de cría ocupan tundras de áreas interiores ou zonas de vexetación baixa, ademais de espazos húmidos.

Nidifican de forma diseminada en lagos, lameiros e pozas entre marzo e xuño. Sitúan a única posta nun niño preto da agua e directamente no chan e tapízano de carriza, liques e penuxe.

A súa área ce cría esténdese por Norteamérica, illas Británicas, Islandia, Escandinavia e norte de Rusia. No noso continente invernan principalmente nas costas occidentais, ao sur da súa área de cría, podendo chegar ao Mediterráneo e norte africano.

En España son aves invernantes comúns en todo o litoral, tanto no Cantábrico e Galicia como en costas mediterráneas, onde son máis dispersas. As rexións que albergan a maior parte dos pentumeiros son Galicia, Andalucía e Cataluña. As súas poboacións invernantes oscilan segundo a crueza dos invernos. Chegan ao noso país entre setembro e decembro e marchan entre os meses de marzo e abril. 

A Reserva Ornitolóxica de SEO/BirdLife do Grove tamén recibe mourelos comuns que pasan os meses fríos na baía da Lanzada, onde se poden observar principalmente entre novembro e febreiro, en grupos preto da rompente das ondas. Un punto ideal para o seu desfrute é o observatorio de A Pantoeira, situado ao norte da praia da Lanzada.

Estes días un grupiño de 15 mourelos comuns pódense ver na baía.

Enviada en 04/11/2020 - Ler entrada completa

Esta tempada 2020 volveu ser moiexitosa para a reprodución da píllara das dunas (Charadriusalexandrinus) nas praias da Lanzada e Area da Cruz da Reserva Ornitolóxica de SEO/BirdLife do Grove.

Dos 16 polos que naceronde 9 niños, 10 chegaron a voar, o que supón o 62´5% de polos voados sobre polos nados.

Todo este éxito débese a algúns factores que enumeramos:

·Ao esforzo e á grande implicación dos voluntarios do grupo SEO-Pontevedra que velan para que esta especie ameazada non desapareza da Reserva.

·Á protección con parcelas de exclusión dos niños por parte do Servizo de Conservación da Natureza.

·Ás 126 xornadas de vixilancia de niños e polos que os voluntarios fixeron desde o 5 de marzo ata o 12 de setembro, cando as píllaras abandonaron as praias. Ademais do esforzo de axentes e vixilantes do espazo.

·Á información que lles impartiron os voluntarios aos 106 donos de cans que houbo nas praias, amosándolles os problemas de conservación que causan nas píllaras.

·A que un ano máis non se retiren as algas da area (onde as píllaras das dunas atopan o seu alimento) e que alimpeza da praia sexa manual e selectiva.

·Ao asesoramento que desde SEO selles imparte aos operarios da limpeza das praias e demais persoal que traballa nelas.

·A que cada ano se leve a píllaradas dunas aos nenos de todos os colexios do Grove para que a coñezan e respecten.

·Ás limpezas de residuos que SEO organizou con voluntariado e que fixeron nas praias fóra da época reprodutora.

·Aínda que este ano non se puideron realizar polo problema do coronavirus, os anos anteriores si que se levaron acabo Xornadas de Sensibilización e Concienciación a pé de praia onde se lles amosaron os pitiños aos usuarios, ademais de repartirlles publicacións relacionadas coa especie.

·A que desde hai algúns anos se retiraran as papeleiras nas praias (foco de atracción de depredadores), e que os usuarios se responsabilizasen dos seus propios residuos.

·Aos carteis informativos da píllaradas dunas que hai nos accesos aos areais.

·Ás distintas xestións realizadaspor SEO-Pontevedra ante as administracións e organismos implicados na conservación da especie.

·Á difusión das noticias da Píllaradas dunas en blogs, en foros de aves, na radio e na prensa escrita.

·Ao anelamento científico de adultos e polos nados este ano nas praias, por parte do Servizo de Conservación da Natureza de Pontevedra.

·Ao traballo que fan pola píllara o Concello do Grove, o Servizo de Conservación da Natureza de Pontevedra (Xuntade Galicia) e os vixilantes e axentes ambientais do espazo.

De todos nós e do noso comportamento adecuado e respectuoso depende o futuro desta xoia do litoral galego.

A todas as persoas que loitan para que non se extinga a Píllara das dunas das praias de Galicia, GRAZAS.

Enviada en 19/10/2020 - Ler entrada completa

Nestes tempos de crise global, as aves son esa xanela á natureza que nos dan felicidade e alas para emprender o voo cara a un novo planeta mellor tratado e verde e que temos que construír entre tod@s.

Por iso antonte domingo celebramos o Día das Aves cunha ruta guiada pola Reserva Ornitolóxica de SEO/BirdLife do Grove.

Nesta ruta percorremos diferentes ecosistemas: intermareal, sistema dunar, baía, praia… e puidemos darlles a coñecer a todos os participantes e gozar de 45 especies de aves, que demostran a gran biodiversidade desta reserva, o seu valor ambiental e a súa excelente calidade de vida.

Estas son algunhas das aves identificadas:

Enviada en 05/10/2020 - Ler entrada completa